Magnús Stephensen dómstjóri skrifar kansellíinu og segir frá að yfir 1000 hvalir hafi verið reknir á land á Akranesi undir forustu Þórðar Jónssonar hreppstjóra.

Með skjölum þeim, þar sem sagt er frá hvalasmöluninni, eru lýsingar á dýrunum, sem á land bárust, en einnig tvö vottorð forsvarsmanna á Akranesi um það að Þórður bjargaði tveimur mönnum úr sjávarháska í júní árið 1807.

Þórður Jónsson var fæddur 1778 en lést 17. júní 1846. Hann var frá Háteigi á Akranesi og varð ungur hreppstjóri í sinni sveit. Síðar flutti hann suður á Kjalarnes en loks í Skildinganes og andaðist þar. Þórður var hinn mesti merkismaður, greindur og kappsamur eins og fram kemur í frásögn Magnúsar Stephensen. Honum var veitt danska dannebrogsorðan í viðurkenningarskyni.

Þórður var vaskur sjómaður og skrifaði alllanga ritgerð um sjósókn í Búnaðarrit Suðuramtsins húss- og bústjórnarfélags árið 1839 sem hét: „Fáeinar formannareglur, áhrærandi siglingar, fiskiveiðar og fleira þar að lútandi, handa ungum formönum“. Er þetta líklega eitt það fyrsta sem skrifað var um siglingatækni og slysavarnir á íslensku.

Jón Torfason og Helga Margrét Reinhardsdóttir gengu frá kynningartexta.
Jón Torfason skrifaði upp bréf Magnúsar Stephensen.